PHXenon Caelum
Established
Nangyari ang kaganapang ito sa buhay ko noong 2007 nang binilin sa akin ng aking tiyahin ang kanyang Residence Unit sa San Juan.
Bago lamang ako sa lugar at malapit lang ito sa aking trabaho sa Pasig, ako na daw muna ang tumira habang s'ya ay nasa Amerika, mula sa Quezon city kinuha ko ang lahat ng gamit ko sa dating kong inuupahan, dumating ako sa building mag-a-alas-tres ng madaling araw.
Mula 6th floor parking ng building, nag-elevator na ako papuntang unit sa 25th floor, hanggang sa may bigla akong nakita sa aking paanan habang nasa elevator, isang babaeng nakapalda na nakalutang ang mga paa, tapos parang bulang naglaho bigla. Winalang-bahala ko na lamang ito at naisip ko na baka pagod lang ako.
Unang araw ko sa unit, hindi ako makatulog, parang may kung ano akong naririnig na iyak, pagbukas ko ng pinto tinanaw ko 'yung hallway, ang dilim, sinundan ko 'yung himig ng umiiyak, nilakasan ko ang loob ko na sundan ang himig na iyon pero bigla na namang nawala, at nung puntong babalik na ako sa aking silid, biglang bumukas ang elevator na wala namang lumabas o pumasok, kumaripas ako ng takbo pagbalik ng aking kwarto.
Sa ikalawang araw, nakatulog naman ako hanggang oras na para pumasok ng trabaho, 6pm ang pasok ko, nang sumakay na ako ng elevator may nakasabay akong isang pamilyar na babae, ngumiti s'ya sa akin, sabi nung babae, "kamusta hija" ang sagot ko "Mabuti naman po" tahimik akong hindi s'ya nililingon kasi parang nakatitig s'ya sa akin, hanggang huminto na sa 6th floor ang elevator, nagsalita muli s'ya "dito ka rin ba naka-park?", hindi na ako sumagot, nagulat nalang ako nang sumabay s'ya sa paglabas sa parking lot sa 6th floor.
Sigurado ako, nakasunod s'ya sa akin dahil nadidinig ko ang tunog ng takong ng kanyang sapatos. Napatanong ako "dito ho ba kayo nakatira o nag-o-opisina?" hanggang sa 'di sumagot ang ginang, pagtalikod ko wala na pala akong kausap, nawalang parang bula ang babae.
Agad na pumasok ako sa kotse at habang pababa ng 6th floor, nakita ko mismo sa side mirror ko na ang babae kanina na punong-puno ng dugo at tila may tinuturo, napapikit ako ng sandali at umalis na ng building ng paspasan.
2am na, tapos na ang work ko sa call center, hindi ko na natapos ang trabaho ko ng maayos dahil inaalala ko ang nakita ko sa parking space ng 6th floor, hindi ko alam kung uuwi ba ako. Habang nagmamaneho ako pabalik ng unit, biglang bumuhos ang malakas na ulan, ang lakas ng kulog at kidlat.
Narating ko muli ang building, alas-tres muli ng madaling araw, kinakabahan ako, nanginginig ako, hanggang sa mag-park muli ako sa 6th floor, tumingin muli ako sa paligid baka naroon na naman ang babaeng punong-puno ng dugo pero wala akong nakita, gumamit na ako ng elevator pero nang pindutin ko ang 25th floor, ang umilaw ay 33rd floor, napasigaw ako kasi ang bilis nito pumaitaas.
Dahan-dahang bumukas ang pinto ng elevator sa ika-33rd floor ng building pero hindi ako lumabas, pinipindot ko ang 25th button pero ayaw pa rin, nanatiling bukas ang elevator, namamatay-matay na ang ilaw sa elevator at naisip ko na baka biglang mag-brownout at maipit ako sa loob, kaya dahan-dahan kong hinakbang ang aking mga paa palabas sa hallway ng 33rd floor, paghakbang ko biglang bukas lahat ng ilaw, sobrang liwanag ng 33rd floor at sabay sara ang elevator, biglang tuluyan ng namatay ang lahat ng ilaw sa buong building, napasigaw na lang ako dahil wala akong makita.
Makalipas ang limang minuto, may humawak sa likod na sobrang lamig, napasigaw ako kaya agad kong kinapa ang daan papunta sa Fire exit pababa, naaaninag ko ito dahil sa liwanag ng mga kidlat mula sa labas, nagkailaw namang bigla dahil gumana na ang generator ng building, bumaba ako gamit ang hagdan papunta sa aking unit nang 'di lumilingon sa likod.
Lumipas ang mga araw, tila natahimik na ang mga kababalaghan, hindi ko rin maipaliwanag na biglang nawala ang pagpaparamdam. Dumaan ang mga araw nasanay na rin ako sa bago kong tirahan, pero may napansin ako, isang lalake ang tila sumusunod sa akin sa 6th floor ng building, hanggang sa biglang hinabol n'ya ako, agad akong nakapasok sa kotse pero agad rin n'ya itong nabuksan.
Nagpupumiglas ako sa loob, hanggang sa sinakal n'ya ako, sinipa ko rin s'ya pero lalong nag-init ang ulo ng lalake, hanggang nilabas na n'ya ang kanyang patalim, humihingi ako ng tulong pero hindi ako marinig ng sinuman dahil sinara nito ang aking sasakyan. Sinaksak n'ya ako sa aking tiyan, pati sa leeg. hanggang sa unti-unti na akong nawalan ng malay.
Tumahimik ang paligid, nang biglang may gumigising sa akin at kumakatok mula sa labas ng aking sasakyan, ang security guard ng building, "Ma'am okey lang ho ba kayo? buong gabi po kayong nakatulog dito sa 6th floor parking." Nananaginip pala ako buong gabi? Pero parang ang sakit ng katawan ko at gaya ng dati sumakay ako ng elevator at muli sa 33rd floor na naman umakyat pero nang pinindot ko ang 25th gumana naman pababa.
Napagtanto ko, na sa bangungot na iyon tila may nangyari sa 6th floor parking, at may kaugnayan ang 33rd floor sa babaeng nagpapakita sa akin, dito na ako nag-imbestiga at umakyat na ako sa 33rd floor. Nakita ko na sa 33rd floor ay isa pa lang dating opisina, marahil ang babaeng nakikita ko ay nagtatrabaho dito noon.
Bumaba naman ako sa 6th floor at bigla-bigla nakasabay ko muli ang naturang babae, muli s'ya nagpakita, bukas na pala muli ang third-eye ko, tinanong ko s'ya "Anong nangyari sa'yo", biglang patak ng dugo na parang gripo sa láρág ng elevator, sumagot ang babae, "Pinatay ako hija, pinatay ako!", nawala ang babae at mga dugo nang may ibang taong pumasok sa elevator.
Pagbaba ko sa 6th floor, nakita ko muli ang babae na muling may tila tinuturo, doon ko nalaman na ang babaeng nagpapakita sa akin ay pinatay sa parking ng 6th floor kahilera ng lugar kung saan naka-park lagi ang aking sasakyan.
Tinanong ko s'ya "Sino ang pumatay sa'yo?", hindi ito sumagot, muli akong nagtanong pero unti-unti nang lumalayo ito sa akin, tumalikod at naglaho.
Mula noon, hindi na nagpakita pa sa akin ang babae, walang ng nagparamdam, wala ng kahit anong himig at pagsabay sa elevator, naging payapa na ang pagtira ko building maging sa 6th floor parking.
Isang araw, pagbukas ko ng telebisyon, bumungad sa akin ang balitang, "dating asawa ng pinatay na aktres noong 2001, nagpatiwakal kahapon July 11, 2007 matapos itong tumalon mula sa ikalawang palapag ng isang gusali sa California."