PHXenon Caelum
Established
68 YEARS AGO — Si Nestor Mata lamang ang nakaligtas mula sa 26 na sakay ng 'Mt. Pinatubo', na-confine ito sa Veterans Memorial Hospital. Nagtamo ito ng third degree burns sa kanyang katawan. Sa isang panayam habang ito'y nasa ospital, sinabi ni Mata;
"Hindi ko alam kung ano pa ang gustong ipagawa sa akin ng Diyos kung bakit buhay pa rin ako, baka may gusto pa s'yang gawin ko kaya ako nakaligtas"
Sa pagpapatuloy nito "Sa pagitan ng 1 at 2 ng madaling-araw nangyari ang lahat, parang nawalan ako ng malay dahil sa pagbagsak namin, nakaupo ako sa ikalawang hilera habang si Presidente ang nasa unahan ko."
"Ako ang unang pumasok sa 'Mt.Pinatubo', sumunod ang Presidente, ito 'yung huli kong nakita ang ngiti ni Magsaysay, Magaling ang piloto namin kaya kumpyansa ako na ligtas kaming lahat, hanggang sa naidlip ako."
"Paggising ko, doon ko na napagtanto nag-crashed pala ang sinasakayan namin, gaya ng dati madalas akong tumingin sa aking relo, nakita ko na alas-tres na ng madaling-araw, naaninag ko ang ganda ng buwan habang nag-aapoy ang paligid."
'Nasusunog ang sarili ko, kaya nagpagulong-gulong ako sa mga damuhan para mamatay ito, sobrang sakit at hapdi ng kalagayan ko, pinilit ko lumayo sa nasusunog na eroplano, habang gumagapang may narinig akong mga tahol ng isang aso."
Nilapitan ako ng aso, tanda ng kanyang muling pagtahol na makakita ng taong gumagalaw, narinig ko ang tahol ng pag-asa, nawala bigla ang aso, pero hindi ako nawalan ng pag-asa, sumisigaw ako ng 'Mr. President, nasaan po kayo, nasaan po kayo? kailangan po kayo ng Bayan, ngunit wala ni isa mang sumagot."
"Hindi ako nawalan ng pag-asa at pinilit kong sumigaw, hanggang sa narinig ko muli ang tahol ng aso, sa pagkakataong ito ay may mga kasama na s'ya."
Napagtanto ng mga tao na ang tinatahol pala ng aso ay simbolo na may nakita itong isang tao na nangangailangan ng tulong, limang oras ang pagitan bago nakumbinsi ng aso na umakyat ang kanyang amo at iba pang mga ka-barrio sa crash site.
"Labing-walong oras kong tiniis ang hapdi, sakit ang hirap, naka-ambang pa ang peligro sa mga tumulong na makuha ako at madala sa ospital dahil sa dami ng bangin para lang maibaba ako. Magkagayun man, bilang mamamahayag kailangan ko pa rin manindigan sa aking sinumpaang tungkulin, at masakit sa akin na malaman na namatay na ang Presidente, at sa akin pa mismo nagmula ang masakit na balita."
Si Nestor Mata ay nagtrabaho sa government radio station bago maging reporter ng The Philippine Herald newspaper, at isa si Mata sa mga Media na kasama sa huling eroplanong sinakyan ng yumaong si Presidente Magsaysay. Ang 'Mt. Pinatubo' o Douglas C-47 Skytrain transport aircraft na sumadsad at bumagsak sa Mount Manunggal o third-highest peak ng probinsya na matatagpuan sa Barangay Magsaysay, Balamban, Cebu Province.