PH
"Pagsabutahe ng isip ko sa aking puso"
Mayroon akong dalawa, sila'y magkaiba
Madalas di tugma, sa bawat pagkilos at gawa
Magkaiba at di akma, sa bawat salita
Bawat isa sa kanila, may kanya-kanyang hiwaga
Malapit man sila sa akin, subalit parang kay layo din
Sa tuwing nanaisin ko, na sila'y pagsunduin
Hindi mawari ng sarili ko, kung paano at bakit
Iniintindi ko na lang, upang di lalo na manakit
Sa bawat pagkakataon, di maipinta ang emosyon
Ang isa sa kanila, iba ang nais na mabaon
Sa paglalakbay ng dalawa, magkaiba ang hangarin
Ngunit napagtanto ko nawa, iisa lang kanilang layunin
Maging masaya ako, sa bawat desiyong taglay ko
Mahanap ang nais, at ikaliligaya ko
Subalit lubos akong nangangamba, pagdating saming tatlo
Ako man ay nakatagpo, sila naman ay di magkasundo
Gusto kitang mahalin, ngunit papaano?
Kung ang dalawang kaibigan ko, labis di magkasundo
Kahit gusto ka, sa bawat pagtibok ng puso
Ngunit ang isip ko, di pa handang maging tayo
