PHArestado ang pitong Chinese matapos magtangkang gumamit ng nakaw na credit card at manuhol sa mga operatiba ng National Bureau of Investigation.
Sinubukan ng mga Chinese national na gamitin ang isang nakaw na credit card sa POS machine ng undercover agent ng Cybercrime Division ng National Bureau of Investigation.
At nang gumana ang credit card, agad nang inaresto ang dalawang Chinese national.
Ayon sa NBI, dahil pinagbawal na ang mga offshore gaming operations sa bansa, naghahanap umano ng paraan ang sindikato para i-encash ang kinikita nila sa mga online scam.
Nakikigamit umano sila ng POS machine kung saan may alok sila na 20 porsyento na porsyento na kita sa transakyon sa may-ari ng machine.
“Before kasi ang POGO operations since may corporation sila may POS machines. Ine-enchash nila hindi sila nahihirapan. Doon na nila nee-ncash. After ng pronouncement hindi na nila nagagawa ‘yun. Tinigil ng BSP,” ayon kay Atty Jeremy Lotoc ng NBI Cybercrime Division.
Matapos ang aresto, nag-alok umano ang lider ng grupo na si Sun Jie ng P1.5 milyon sa mga operatiba para sila ay palayain at huwag nang kasuhan.
“Hindi ako nakikipagplastikan, hindi ako nagmamalinis, pero I ordered them arrested!” ayon kay NBI Director Jaime Santiago.
Agad inaresto ang limang Chinese national sa parking area ng NBI headquarters na maghahatid umano ng suhol.
Nabawi sa kanilang sasakyan ang P1.5 milyon, at may nadiskubre pang smoke bomb grenade at tatlong baril. Walang napakitang papel ang mga suspek sa mga armas.
“May 45 caliber.. paano sila nakakuha ng ganitong high grade firearms?” ayon kay Lotoc.
Wala umano sa grupo ang umamin kung kanino ang mga armas. Itinanggi rin ng suspek ang mga paratang.
Ayon sa NBI, malaki ang epekto ng ban sa mga POGO, at nagbabala sa mga maaring tumulong sa mga sindikato sa kanilang panloloko.
“They are now in a hurry na ma-tansfer o mailipat ang kanilang pera,” ayon kay Santiago.
“Madadamay sila pagmagpapagamit sila at pag na identify, huhulihin namin ot kakasuhan,” dadag pa ni Lotoc.
Kulong ang mga suspek sa paglabag sa Access Devices Regulation Act, Comprehensive Firearm and Ammunition Act at Corruption of Public Officials.