PHIsa sa dalawang nahuling banyagang suspek ng Bureau of Immigration at Presidential Anti-Organized Crime Commission o PAOCC sa isang bahay sa Tuba, Benguet ang nadiskubreng IT manager umano ng POGO hub sa Porac, Pampanga.
Nasa red notice din siya ng Bureau of Immigration dahil pugante umano siya sa China.
Si Sun Liming ang banyagang nahuli ng Bureau of Immigration at Presidential Anti Organized Crime Commision sa bisa ng isang mission order ng BI sa isang bahay sa Tuba Benguet, noong Sabado, Hulyo 27, kung saan sinasabi ng PAOCC na may impormasyon silang opisyal ng Lucky South 99 ang nagtatago roon.
Itinanggi naman ni dating Presidential spokesperson Attorney Harry Roque sa Senado nitong Lunes na siya ang may ari ng bahay na pinagtaguan umano ng dayuhan.
Sa pamamagitan ng isang interpreter, tinanggi ni Liming na nagtatrabaho sila sa POGO sa Porac. Nandoon lang umano siya sa Benguet para mag-golf.
Ayon sa PAOCC, nasa Interpol Red Notice si Liming.
"Kumpanya niya yung linning.com...Ito'y nakapanloko ng Chinese nationals na umaabot sa 7 billion yuan o kung ico- convert ay umaabot na ito sa 56 billion pesos...si Sun Liming, siya 'yung pinaka-IT manager nila, yung IT expert, siya gumagamit ng online scamming platforms nila na ginagamit ng mga POGO hubs. Ito 'yung nagde-design," ayon kay PAOCC chief Usec Gilbert Cruz.
Ipinakita ng ABS-CBN News ang kopya ng Interpol Red Notice kay Liming at inamin nito na siya ang nasa larawan.
Sabi pa ng PAOCC, nag iba-iba umano ang nasyonalidad ang ginagamit ni Liming para magtago umano sa mga awtoridad.
“Nagpanggap siyang Cambodian national bago namin natuklasan na siya ay isang Chinese national, ang ginamit niyang pangalan ay 'Kun Wer' nagpangagap siya na Cambodian. Automatic kailangan submit namin picture ginawan ng biometrics," ayon kay Cruz.
Nababahala na rin ng PAOCC dahil sa dami ng mga naaresto nilang pugante mula sa China, tila ginagawa na umanong taguan ng mga pugante ang bansa.
Sa Huwebes ay nakatakdang i-deport ang nasa mahigit 30 banyaga. Tatlo rito ay mga pugante, kabilang na si Liming.
Samantala, nilinaw ni Roque na hindi nila alam na ang lessee ng PH2 Corporation na si Wan Yun ay may partner na nagtatago sa mga awtoridad sa China.
"Unfortunately, we were unaware that Ms. Wan Yu has a male partner who has evaded arrest in China. We will never allow our properties to be leased by any Filipino or foreign fugitive from justice," paliwanag niya sa isang pahayag.
Dagdag pa ni Roque, tinapos na ng PH2 Corporation, kung saan isa siyang stockholder, ang lease contract nito kay Wan Yu.
Nanindigan rin siya na walang alam ang PH2 Corporation na may puganteng naninirahan sa kanilang "corporate-owned house" sa Pinewoods Golf and Country Club sa Tuba, Benguet.