PH"NAKAKALUNGKOT AT NAKAKASAKIT NG PUSO"
Takot na takot nang pumasok ulit ang Grade 5 student na pamangkin ni Jeannie Vargas kahit kasisimula pa lang ng face-to-face classes.
Iyak nang iyak kasing umuwi ang estudyante pagkagaling sa unang araw ng pasukan dahil sa aniya'y masakit na salitang binitawan umano ng kaniyang guro.
"Paano mong nasasabi [ang] mga ganitong bagay sa isang 10-year old sa pinakaunang araw ng pasukan nila? Kung hindi po masaya sa pagiging guro sa mga bata, hanap na lang po ng ibang career. 'Wag niyong idamay mga estudyante na sumusubok pa lang lumaban sa buhay," gigil na ibinahagi ni Jeannie.
"Hindi niyo po deserve ang lisensya na [para] dapat sa ibang tao na mas may malasakit sa mga bata," dagdag niya.
Hindi niya matanggap na ang gurong nagtuturo sana ng mabuting asal, ganito ang asta sa mga mag-aaral.
"Kaya kung para po sa proteksyon ng ibang bata pa na magiging estudyante ninyo, gagawin po namin lahat para 'di na kayo maging teacher ng iba pa," mensahe niya sa naturang guro.
"At sa mga parents naman, let's check on our kids pagkagaling sa school. Minsan, baka tahimik lang pero sobra na palang pambubully ang nakukuha sa school... 'Wag po tayong matakot to stand up for our kids. 'Pag nakikita nila na kaya natin silang ipaglaban sa mga taong mali, matututo rin silang ipaglaban [ang] mga sarili nila balang araw," payo niya naman sa mga magulang.
Sa ngayon, pinagsusumite ng Department of Education ang pinuno ng paaralan ng incident report ukol sa nangyari.
Source: News5